2.
[3]
et quamquam a Q. Hortensio, clarissimo viro atque eloquentissimo,
causa est P. Sesti perorata, nihilque ab eo praetermissum
est quod aut pro re publica conquerendum fuit aut
pro reo disputandum, tamen adgrediar ad dicendum, ne mea
propugnatio ei potissimum defuisse videatur per quem est
perfectum ne ceteris civibus deesset. atque ego sic statuo,
iudices, a me in hac causa atque hoc extremo dicendi loco
pietatis potius quam defensionis, querelae quam eloquentiae,
doloris quam ingeni partis esse susceptas.
[4]
itaque si aut
acrius egero aut liberius quam qui ante me dixerunt, peto
a vobis ut tantum orationi meae concedatis quantum et pio
dolori et iustae iracundiae concedendum putetis; nam neque1
officio coniunctior dolor ullius2 esse potest quam hic meus
susceptus ex hominis de me optime meriti periculo, neque
iracundia magis ulla laudanda est3 quam ea quae me4 inflammat
eorum scelere qui cum omnibus meae salutis defensoribus
bellum esse sibi gerendum iudicaverunt.
[5]
sed
quoniam singulis criminibus ceteri responderunt, dicam
ego de omni statu P. Sesti, de genere vitae, de natura, de
moribus, de incredibili amore in bonos, de studio conservandae
salutis communis atque oti; contendamque, si modo
id consequi potero, ut in hac confusa atque universa defensione
nihil ab5 me quod ad vestram quaestionem, nihil quod
ad reum, nihil quod ad rem publicam pertineat praetermissum
esse videatur. et quoniam in gravissimis temporibus
civitatis atque in ruinis eversae atque adflictae rei
publicae P. Sesti tribunatus est a Fortuna ipsa conlocatus,
non adgrediar ad illa maxima atque amplissima prius quam
docuero quibus initiis ac fundamentis haec6 tantae summis in
rebus laudes excitatae sint.
Click on a word to bring up parses, dictionary entries, and frequency statistics
1 nam neque ut Madv. ita G2: nãq: (= namque) P: nam qui Bς: numquam H: neque k
2 ullius P rell. praeter Hwks (ullus: et ita Madv. edd.)
3 laudanda est Halm: laudandans P1 laudanda rell.
4 quae me om. P1: quam mea inflammata Halm: quam illa quae inflammata G
5 ab ut Halm ita Hk: a PB corr. ex ad, k
6 haec P: hae P corr., BHGk
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.