Click on a word to bring up parses, dictionary entries, and frequency statistics
31.
senatus, quo die primum est in Capitolio
consultus,
[2]
decrevit, ut eo anno duplex tributum imperaretur, simplex confestim exigeretur, ex quo stipendium
praesens omnibus militibus daretur, praeterquam qui
milites ad Cannas fuissent.
[3]
de exercitibus ita
[p. 160]
decreverunt, ut duabus legionibus urbanis Ti. Sempronius
consul Cales ad conveniendum diem ediceret; inde eae
legiones in castra Claudiana supra Suessulam deducerentur.
[4]
quae ibi legiones essent—erant autem Cannensis maxime exercitus—, eas Appius Claudius Pulcher
praetor in Siciliam traiceret, quaeque in Sicilia essent,
Romam deportarentur.
[5]
ad exercitum, cui ad conveniendum Cales edicta dies erat, M. Claudius Marcellus
missus, isque iussus in castra Claudiana deducere
urbanas legiones.
[6]
ad veterem exercitum accipiendum
deducendumque inde in Siciliam Ti. Maecilius Croto
legatus ab Ap. Claudio est missus.
[7]
taciti primo expectaverant homines uti consul
comitia collegae creando haberet; deinde, ubi ablegatum
velut de industria M. Marcellum viderunt, quem maxime
consulem in eum annum ob egregie in praetura res
gestas creari volebant, fremitus in curia ortus.
[8]
quod
ubi sensit consul, 'Utrumque' inquit 'e re publica fuit,
patres conscripti, et M. Claudium ad permutandos exercitus in Campaniam proficisci et comitia non prius
edici, quam is inde confecto, quod mandatum est,
negotio revertisset, ut vos consulem, quem tempus rei
publicae postularet, quem maxime voltis, haberetis.'
ita de comitiis, donec rediit Marcellus, silentium fuit.
[9]
interea duumviri creati sunt Q. Fabius Maximus et
T. Otacilius Crassus aedibus dedicandis, Menti Otacilius, Fabius Veneri Erucinae; utraque in Capitolio est,
canali uno discretae.
[10]
et de trecentis equitibus Campanis, qui in Sicilia cum fide stipendiis emeritis Romam
venerant, latum ad populum, ut cives Romani essent,
item uti municipes Cumani essent ex pridie, quam populus Campanus a populo Romano defecisset.
[11]
maxime,
ut hoc ferretur, moverat, quod, quorum hominum essent,
scire se ipsi negabant, vetere patria relicta in eam
civitatem, in quam redierant, nondum adsciti.
[12]
postquam
Marcellus ab exercitu rediit, comitia consuli subrogando
in locum L. Postumii edicuntur.
[13]
creatur ingenti consensu
[p. 161]
Marcellus, qui extemplo magistratum occiperet.
cui ineunti consulatum cum tenuisset, vocati augures
vitio creatum videri pronuntiaverunt; volgoque patres
ita fama ferebant, quod tum primum duo plebei consules facti essent, id deis cordi non esse.
[14]
in locum
Marcelli, ubi is se magistratu abdicavit, suffectus
Q. Fabius Maximus tertium.
mare arsit eo anno;
[15]
ad Sinuessam bos eculeum
peperit; signa Lanuvii ad Iunonis Sospitae cruore manavere, lapidibusque circa id templum pluit. ob quem
imbrem novemdiale, ut adsolet, sacrum fuit, ceteraque
prodigia cum cura expiata.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.