Click on a word to bring up parses, dictionary entries, and frequency statistics
[88]
verum ergo
illud est, quod a Tarentino Archyta, ut opinor, dici
solitum nostros senes commemorare audivi ab aliis
senibus auditum: si quis in caelum ascendisset
naturamque mundi et pulchritudinem siderum perspexisset, insuavem illam admirationem ei fore,
quae iucundissima fuisset, si aliquem cui narraret
habuisset. Sic natura solitarium nihil amat semperque ad aliquod tamquam adminiculum adnititur, quod
in amicissimo quoque dulcissimum est.
[p. 196]
24. sed cum tot signis eadem natura declaret
quid velit anquirat desideret, tamen obsurdescimus
nescio quo modo nec ea, quae ab ea monemur,
audimus. est enim varius et multiplex usus amicitiae multaeque causae suspicionum offensionumque
dantur, quas tum evitare, tum elevare, tum ferre
sapientis est. una illa subeunda1 est offensio ut et
utilitas in amicitia et fides retineatur; nam et
monendi amici saepe sunt et obiurgandi, et haec
accipienda amice, cum benevole fiunt.
1 subeunda edd.; sublevanda aMSS.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.