Titus Livius (Livy), The History of Rome, Book 45
Alfred C. Schlesinger, Ph.D., Ed.

[3] "Servius quidem Galba, si in L. Paulo accusando tirocinium ponere et documentum eloquentiae dare voluit, non triumphum impedire debuit, quem, si nihil aliud, [4?] senatus iustum esse iudicaverat, sed postero die quam triumphatum esset,⁶ privatum eum cum⁷ visurus esset, nomen deferret et legibus interrogaret; aut serius paulo, cum primum magistratum⁸ ipse cepisset, diem diceret inimico et eum ad⁹ populum accusaret. [5] ita et pretium recte facti triumphum haberet L. Paulus pro egregie bello gesto et poenam, si quid et vetere gloria sua et nova indignum fecisset.

[p. 376] [6] "sed videlicet, cui nullum¹⁰ crimen, nullum probrum¹¹ dicere poterat, eius obtrectare laudes voluit. diem integrum hesterno die ad¹² accusandum L. Paulum petit; quattuor horas, quantum supererat diei, dicendo absumpsit. [7] quis umquam tam nocens reus fuit, cuius vitia vitae tot horis expromi non possent? quid interim obiecit, quod L. Paulus, si causam dicat, negatum velit? [8] duas mihi aliquis contiones parumper faciat, unam militum Macedonicorum, puram alteram et¹³ integrioris iudicii a favore et odio, universi populi Romani.¹⁴ apud contionem togatam et urbanam prius reus agatur. [9] quid apud Quirites Romanos, Ser. Galba, diceres? illa enim tibi tota abscisa oratio esset ' in statione severius et intentius stetisti;¹⁵ vigiliae acerbius et diligentius circumitae sunt; operis plus quam antea fecisti, cum ipse imperator ut¹⁶ exactor circumiret; eodem die et iter fecisti et in aciem ex itinere existi; [10] ne¹⁷ victorem quidem te adquiescere passus est; statim ad persequendos hostes duxit. cum te praeda partienda locupletem facere posset, pecuniam regiam translaturus in triumpho est et in aerarium laturus.' [11] haec sicut ad militum animos stimulandos aliquem aculeum habent, qui parum licentiae, parum avaritiae suae inservitum censent, [p. 378] ita apud populum Romanum nihil valuissent, [12?] qui, ut¹⁸ vetera atque audita a parentibus suis non repetat, quae ambitione imperatorum clades acceptae sint, quae severitate imperii victoriae partae, proximo certe Punico bello, quid inter M. Minucium magistrum equitum et Q. Fabium Maximum dictatorem interfuerit, meminit. [13] itaque apparuisset neque¹⁹ accusatorem hiscere potuisse et supervacaneam defensionem²⁰ Pauli fuisse.

[14] "transeatur ad alteram contionem; nec Quirites vos, sed milites videor appellaturus, si nomen hoc saltem ruborem incutere et verecundiam aliquam imperatoris violandi adferre possit.