Titus Livius (Livy), The History of Rome, Book 44
Alfred C. Schlesinger, Ph.D., Ed.

[p. 130] Perseus cum audisset simul Meliboeam a consulis³ exercitu oppugnari, simul classem Iolci⁴ stare, ut⁵ inde Demetriadem adgrederetur, Euphranorem quendam ex ducibus cum delectis duobus milibus Meliboeam mittit. [5] eidem imperatum, ut si a Meliboea summovisset Romanos, Demetriadem prius occulto itinere intraret, quam ab Iolco ad urbem castra moverent Romani. [6] et ab oppugnatoribus Meliboeae, cum in superioribus locis repente apparuisset, cum trepidatione multa relicta opera sunt ignisque⁶ iniectus. [7] ita a Meliboea abscessum est. Euphranor soluta unius urbis obsidione Demetriadem extemplo ducit. nocte moenia intrat tantamque fiduciam incolentibus fecit ut non moenia⁷ modo, sed agros etiam confiderent se a populationibus tueri posse; et eruptiones⁸ in vagos populatores non sine volneribus hostium factae sunt. [8] circumvecti tamen moenia sunt praetor et rex, situm urbis contemplantes, si qua parte temptare aut opere aut vi possent. [9] fama fuit per Cydantem Cretensem et Antimachum, qui Demetriadi praeerat, tractatas inter Eumenen et Persea condiciones amicitiae. Ab Demetriade certe abscessum est. [10] Eumenes ad consulem navigat; gratulatusque,⁹ quod prospere Macedoniam intrasset, Pergamum in regnum abit. [11] Marcius Figulus praetor parte classis in hiberna Sciathum missa cum reliquis navibus Oreum Euboeae¹⁰ petit, eam urbem [p. 132] aptissimam ratus unde exercitibus qui in Macedonia quique¹¹ in Thessalia erant, mitti commeatus possent. de Eumene rege longe diversa tradunt. [12] si Valerio Antiati credas, nec classe adiutum ab eo praetorem esse, cum saepe eum litteris accersisset, tradit, nec cum gratia ab consule profectum in Asiam, indignatum quod, ut iisdem castris tenderet permissum non fuerit; [13] ne ut equites quidem Gallos quos secum adduxerat relinqueret, impetrari ab eo potuisse. [14] Attalum fratrem eius et remansisse apud consulem, et sinceram eius fidem aequali tenore egregiamque operam in eo bello fuisse.