Titus Livius (Livy), The History of Rome, Book 34
Evan T. Sage, Ph.D. Professor of Latin and Head of the Department of Classics in the University of Pittsburgh, Ed.

3. quid enim, si hoc expugnaverint, non temptabunt? recensete omnia muliebria iura quibus licentiam earum adligaverint maiores vestri per quaeque eas¹ subiecerint viris; quibus omnibus constrictas vix tamen continere potestis. quid? [2] si carpere singula et extorquere² et exaequari ad extremum viris patiemini, tolerabiles vobis eas fore creditis? [3] extemplo, simul pares esse coeperint, superiores erunt. at hercule ne quid novum in eas rogetur recusant, non ius sed iniuriam deprecantur, immo, [4?] ut quam accepistis iussistis suffragiis vestris legem, quam usu tot annorum et experiendo comprobastis, hanc ut abrogetis, id est, ut unam tollendo legem ceteras infirmetis. [5] nulla lex satis commoda omnibus est; id modo quaeritur si maiori parti et in summam prodest. si, quod cuique privatim officiet ius, id destruet ac demolietur, quid attinebit universos rogare leges, quas mox abrogare in quos latae sunt possint? [6] volo tamen audire quid sit, propter quod matronae consternatae procucurrerint in publicum ac vix foro se et contione abstineant. [7] ut captivi ab Hannibale redimantur parentes, viri, liberi, fratres [p. 420] earum? procul abest absitque semper talis fortuna³ rei publicae; sed tamen, cum fuit, negastis hoc piis precibus earum. [8] at non pietas nec sollicitudo pro suis, sed religio congregavit eas: matrem Idaeam a Pessinunte ex Phrygia venientem accepturae sunt. quid honestum dictu saltem seditioni praetenditur muliebri? [9] 'Ut auro et purpura fulgamus' inquit 'ut carpentis festis profestisque diebus, velut triumphantes de lege victa et abrogata et captis et ereptis suffragiis vestris per urbem vectemur; ne ullus modus sumptibus, ne luxuriae sit.'