19.
[56]
bono te animo tum, Q. Hortensi,
populus Romanus et ceteros qui erant in eadem
sententia dicere existimavit et ea1 quae sentiebatis; sed
tamen in salute communi idem populus Romanus dolori
suo maluit quam auctoritati vestrae obtemperare. itaque
una lex, unus vir, unus annus non modo vos2 illa miseria ac
turpitudine liberavit sed etiam effecit ut aliquando vere
videremini3 omnibus gentibus ac nationibus terra marique
imperare.
[57]
quo mihi etiam indignius videtur obtrectatum
esse adhuc, Gabinio dicam anne Pompeio an utrique, id
quod est verius, ne legaretur A. Gabinius Cn. Pompeio
expetenti ac postulanti. Vtrum ille qui postulat ad tantum
bellum legatum4 quem velit idoneus non est qui impetret,
cum ceteri ad expilandos socios diripiendasque provincias
quos voluerunt5 legatos eduxerint, an ipse cuius lege salus
ac dignitas populo Romano atque omnibus gentibus constituta
est expers esse debet eius imperatoris6 atque eius7
exercitus qui consilio ac periculo illius8 est constitutus?
an C.
[58]
Falcidius, Q. Metellus, Q. Caelius Latiniensis, Cn.
Lentulus, quos omnis honoris causa nomino, cum tribuni
plebi fuissent, anno proximo legati esse potuerunt; in uno
Gabinio sunt tam diligentes qui in hoc bello quod lege
Gabinia geritur9, in hoc imperatore atque exercitu quem per
vos ipse constituit, etiam praecipuo iure esse debebat10? de
quo legando consules spero ad senatum relaturos. qui si
dubitabunt aut gravabuntur, ego me profiteor relaturum;
neque me impediet cuiusquam iniquitas11 quo minus vobis12
fretus vestrum ius beneficiumque defendam, neque praeter
intercessionem quicquam audiam13, de qua, ut ego14 arbitror,
isti ipsi qui minitantur15 etiam atque etiam quid liceat considerabunt.
mea quidem sententia, Quirites, unus A. Gabinius
belli maritimi rerumque gestarum Cn. Pompeio
socius16 ascribitur, propterea quod alter uni illud17 bellum
suscipiendum vestris suffragiis detulit, alter delatum susceptumque
confecit.
This text is part of:
Search the Perseus Catalog for:
Click on a word to bring up parses, dictionary entries, and frequency statistics
1 et ea H: ea cett.
2 vos scripsi: ros codd.
3 videremini (videmini) H: videremur cett.
4 ad tantum bellum leg. HE: leg. ad tantum bellum Tδ
5 voluerint H
6 eius imperatoris scripsi
7 victoriae atque eius imper. H: eius gloriae atque imper. ET: gloriae eius imper. δ
8 ac periculo illius H: ipsius ac periculo cett.
9 gereretur H
10 debebat H: deberet cett.
11 iniquitas H: initia Schol.: inimicum edictum cett.
12 vobis fretus HE: fretus vobis cett.
13 audiam H: audeam cett.
14 ego H: om. cett.
15 minitantur (muni-) H: minantur cett.
17 illud id b1
M. Tullius Cicero. M. Tulli Ciceronis Orationes: Recognovit brevique adnotatione critica instruxit Albertus Curtis Clark Collegii Reginae Socius. Albert Curtis Clark. Oxonii. e Typographeo Clarendoniano. 1908. Scriptorum Classicorum Bibliotheca Oxoniensis.
The National Endowment for the Humanities provided support for entering this text.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.