Click on a word to bring up parses, dictionary entries, and frequency statistics
24. sed momento temporis et navium virtus
et usus maritimae rei terrorem omnem Rhodiis
dempsit.
[2]
nam et in altum celeriter evectae naves
locum post se quaeque venienti ad terram dedere,
et si qua concurrerat rostro cum hostium nave, aut
proram lacerabat, aut remos detergebat, aut libero
inter ordines discursu praetervecta in puppim impetum dabat.
[3]
maxime exterruit hepteris regia a
multo minore Rhodia nave uno ictu demersa; itaque
iam1 haud dubie dextrum cornu hostium in fugam inclinabat.2
[4]
Eudamum in alto multitudine navium maxime Hannibal, ceteris omnibus longe praestantem, urgebat, et circumvenisset, ni signo sublato ex praetoria nave, quo dispersam classem in unum
colligi mos erat, omnes quae in dextro cornu vicerant
naves ad opem ferendam suis concurrissent.
[5]
tum
et Hannibal quaeque circa eum naves erant capessunt fugam; nec insequi Rhodii ex magna parte
[p. 360]
aegris et ob id celerius fessis remigibus potuerunt.3 cum
[6]
in alto ubi substiterant cibo reficerent vires,4 contemplatus Eudamus hostes claudas mutilatasque naves apertis navibus remulco trahentes, viginti paulo amplius integras abscedentes, e turri praetoriae navis silentio facto “exsurgite” inquit “et egregium
spectaculum capessite oculis.
[7]
” consurrexere omnes,
contemplatique trepidationem fugamque hostium
prope5 una voce omnes ut sequerentur exclamaverunt. ipsius Eudami multis ictibus vulnerata navis erat;
[8]
pamphilidam et Chariclitum insequi quoad putarent tutum iussit.
[9]
aliquamdiu secuti sunt; postquam terrae appropinquabat Hannibal, veriti ne includerentur vento in hostium ora, ad Eudamum revecti hepterem captam, quae primo concursu icta erat,
aegre Phaselidem pertraxerunt.
[10]
inde Rhodum non
tam victoria laeti, quam alius alium accusantes, quod
cum potuisset, non omnis submersa aut capta classis
hostium foret, redierunt.
[11]
Hannibal, ictus6 uno proelio adverso, ne tum quidem praetervehi Lyciam audebat, cum coniungi veteri regiae classi quam primum cuperet;
[12]
et ne id ei facere liberum esset, Rhodii Chariclitum cum viginti navibus rostratis ad Patara et Megisten portum miserunt.
[13]
Eudamum cum septem navibus maximis ex ea classe, cui praefuerat, Samum redire ad Romanos iusserunt, ut,
quantum consilio, quantum auctoritate valeret,
compelleret Romanos ad Patara expugnanda.
[p. 362]
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.