This text is part of:
Click on a word to bring up parses, dictionary entries, and frequency statistics
40.
Eodem anno Galliarum civitates ob magnitudinem
aeris alieni rebellionem coeptavere, cuius extimulator acerrimus inter Treviros Iulius Florus, apud Aeduos Iulius
Sacrovir. nobilitas ambobus et maiorum bona facta eoque
Romana civitas olim data, cum id rarum nec nisi virtuti
pretium esset. ii secretis conloquiis, ferocissimo quoque
adsumpto aut quibus ob egestatem ac metum ex flagitiis
maxima peccandi necessitudo, componunt Florus Belgas,
Sacrovir propiores Gallos concire. igitur per conciliabula
et coetus seditiosa disserebant de continuatione tributorum,
gravitate faenoris, saevitia ac superbia praesidentium, et discordare militem audito Germanici exitio. egregium resumendae libertati tempus, si ipsi florentes quam inops Italia,
quam inbellis urbana plebes, nihil validum in exercitibus nisi
quod externum, cogitarent.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.