Sunt, quibus eloquii datur aurea vena, poetae,
Sed cadit in sordes inficiturque luto.
Nam Cypriae curas et olentia gaudia ponunt,
Claraque tam foedo mergitur unda lacu.
5Hoc decus, hoc animis carmen coelestibus aptum
Rebus in immundis degenerare nephas.
Dona Dei carmen nitidum, facundia praestans,
Mittitur ex astris a Superisque datur.
Est tuba Romanae fidei legumque poesis,
10Quae canat heroo sacra Deumque pede.
Carmina, quae sanctos Deus ipse paravit ad usus,
Impia mortiferi criminis arma facis.
Quid maculas turpi divina libidine dona?
Quid teris immundo munera tanta pede?
15Non ita Hieremias docuit, non Thracius Orpheus,
Non ita Iessei regia Musa senis.
Sancta prophanari scelus est delebile multo
Verbere, supplicio culpa pianda gravi.
Vita decet sacros et pagina casta poetas,
20Castus enim vatum spiritus atque sacer.
Si proba vita tibi lascivaque pagina, multos
Efficis incestos in Veneremque trahis.
Verba movent animos, oris lascivia pectus
Pulsat et in venas semina mortis agit.
25Improbus has sordes in carmina seminat Orchus,
Cui studium mentes commaculare pias.
Non secus ac, vitreum si quis vult laedere fontem,
Proiicit in dulces putre cadaver aquas.
Hoc animadvertas, quicunque poemata condis,
30Est opus: a Stygio fer procul amne pedem,
Pelle pharetrati cum matre Cupidinis arcum
Atque Dioneo subtrahe colla iugo.
Mater adulterii Venus est stuprique repertrix
Atque lupanari fornicibusque favet.
35Casta Dei genitrix, castus regnator Olympi,
Mens capit ambrosias non nisi casta dapes.
Lex Venerem festis vetat exercere diebus.
Sacra ministrorum corpora casta volunt
Pierides castae, castae Libetrides undae.
40Tota pudiciciam vera poesis amat:
Est Helicon virgo, virgo Peneia Daphne,
Castalides aiunt virgine matre satas.
Ite procul Veneris vates Heliconis ab amne!
Virgineus vestro laeditur ore liquor.
45Non hederae vobis, Phoebi non convenit arbor,
Non amat incestas casta corona comas.
Taxus olens, eruca salax, gravis herba cicutae,
Sordidulos vates talia serta decent.
Salmacis est vobis Helicon, date vota Priapo,
50Hellespontiacis ponite thura focis,
Sit liquor Asphalti vobis pro Phocidis unda,
Stringit ubi infames sulfuris ardor aquas.
Desine, pone lyram, vates insane, nec ultra
Cum Stygiis Dirces flumina iunge vadis!
55Prostituis Musas meretricis imagine facta,
Ante cavernosi fornicis antra locas,
Frangis honestatem frontis gremiumque sinumque
Solvis et infames mittis in ora modos.
Omnia das turpi Musis loca sacra Dione
60Atque pudiciciae non sinis esse locum.
Propterea merito pro vate vocabere laeno,
Elogio sceleri conveniente tuo.
Si legeret casu spurcum Lucretia carmen,
Contereret presso carmina lecta pede.
65Quod prohibet fieri, quod vult natura taceri,
Promis et urbanum mellifluumque putas:
Falleris haud aliter quam, qui pro piscibus hydros,
Pro violis tribulos aut aconita legit.
Id canis, a sola quod sit meretrice videndum,
70Quod nisi lascivo non queat ore legi.
I procul a gravium coetu, scelerate, virorum,
Fer procul a sacra relligione gradum!
Haec levitas gravibus fit perniciosa poetis.
Namque leves studio credimur esse pari,
75Non bene de fidei rebus sentire putamur,
Innocui culpae laedimur ense tuae.
Hi veriti non sunt sanctas per scorta sorores
Ducere et ad tantum sollicitare nefas.
Vina Mimalloniae vobis dant Cretica Bacchae,
80Et vetat infundi sordida Thyas aquam.
Tale docet Semeles puer et Laemargia carmen,
Bacchidas et Veneres ista poesis olet.
Castalium veri potant, non vina poetae,
Sobrietas fons est ebrietasque merum.
85Qui bibit assidue gelidis de fontibus undam
Et vitreo siccam diluit amne sitim,
Carmina casta facit, Veneris commertia vitat
Nec movet ad versus ora pudica leves.
Vina iocosque canunt Veneris Bacchique poetae;
90Quod latet in vapido pectore carmen, olet.
Hi sunt, quos statuens sancti consortia coetus
Esse procul iusta iussit ab urbe Plato.
Fautores scelerum corruptoresque iuventae
In mala deceptum plurima vulgus agunt,
95Dumque licere volunt, suasit quaecunque voluptas,
In mores acuunt spicula multa pios.
Improba garrulitas verbisque procacibus ardens
Seminat in sanctam noxia verba fidem.
I, miser, et veniam Superos pro crimine posce!
100Ante flagellati vulnera quinque Dei
Voce, genu flexo, lachrymis et pectore tunso,
Fletibus erroris damna repende tui!
Carmine qui celebrat vesana Cupidinis arma
Et Veneri nervos ingeniumque dicat,
105Hic iacit in saniem violas, in stercus amomum
Atque sub obscoenos lilia verna sues,
Sulfuream Laethes haurit de fontibus undam
Et Stygiam lato gutture potat aquam,
Se facit indignum, Superos qui cernat et astra.
110Nam miser in solam lumina vertit humum,
Transfugit a Superis ad limina Ditis et ardet
Gaudia contempto luxuriosa Deo.
Est opus ardentem frenis arcere iuventam
Nec sinere in mores luxuriare malos.
115Collige terrenis mixtum de sordibus aurum,
Gemmaque in illustri splendeat ista loco!
Est Deus, est trinum semper laudabile numen,
Unde trahunt rerum semina prima genus,
Spirituum soboles coelique decemplicis astra
120Astrorumque vices multiplicesque viae.
Sunt animae Divum, nitido quos ethere virtus
Donat, et hos sanctos indigetesque vocant,
Et quae materiam prebent elementa caducis
Rebus et aeternae dant alimenta neci.
125Sunt Herebi manes, sunt tartara nigra lacusque
Sulfurei et nigri regna profunda Iovis,
Sunt loca poenarum, sunt altae ergastula mortis,
Sub quibus aeterno Lucifer igne calet.
Sunt scelerum poenae tormentaque debita nostris
130Sordibus et Veneri carminibusque tuis.
Sunt ea, quae profert aer, quae parturit aequor,
Quae generat pingui dedala terra sinu,
Multicolor facies agri sylvaeque comantes,
Multisonae volucres multivagaeque ferae.
135Sunt sophiae partes, est ingeniosa mathesis
Verbaque clamosi litigiosa fori,
Sunt hominum vitae, sunt digna negocia versu,
Plurima gesta foris, plurima gesta domi.
Collige divorum mortes et fortia facta!
140Inclyta martyrii bella rubentis habes,
Iugera multiferae tibi sunt telluris et horti,
Navigium, merces velivolumque mare.
Sunt tibi pampineo vestiti palmite colles,
Sunt iuga, sunt valles multicomumque nemus,
145Arva, lacus, urbes, castella, suburbia, villae.
Sunt cava, sunt tenui flumina pressa vado.
Elige de multis aliquid, tibi copia rerum
Maxima, materiam carminis ista ferent.
Nata freto Venus est, Veneremque sub aequora mitte,
150Infima qua nigris pallet abyssus aquis.
Id cane, quod tetrici possint audire Catones,
Quod probet Hippolyti Penelopesque pudor!
Tunc ego te vatis dignum cognomine dicam,
Tunc tua cantari digna poesis erit,
155Tunc Helicona bibes castisque rigabere lymphis,
Si Venus in versu non erit ulla tuo.
This text is part of:
Click on a word to bring up parses, dictionary entries, and frequency statistics
contra poetas impudice loquentes (M. Madrid Castro, 1996).
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.