Click on a word to bring up parses, dictionary entries, and frequency statistics
82.
Temptavit tamen Antonius vocatas ad contionem
legiones mitigare, ut castris iuxta pontem Mulvium positis
postera die urbem ingrederentur. ratio cunctandi, ne asperatus proelio miles non populo, non senatui, ne templis quidem ac delubris deorum consuleret. sed omnem prolationem
ut inimicam victoriae suspectabant; simul fulgentia per collis
vexilla, quamquam imbellis populus sequeretur, speciem hostilis exercitus fecerant. tripertito agmine pars, ut adstiterat,
Flaminia via, pars iuxta ripam Tiberis incessit; tertium agmen
per Salariam Collinae portae propinquabat. plebs invectis
equitibus fusa; miles Vitellianus trinis et ipse praesidiis occurrit. proelia ante urbem multa et varia, sed Flavianis consilio ducum praestantibus saepius prospera. ii tantum conflictati sunt qui in partem sinistram urbis ad Sallustianos
hortos per angusta et lubrica viarum flexerant. superstantes
maceriis hortorum Vitelliani ad serum usque diem saxis pilisque subeuntis arcebant, donec ab equitibus, qui porta Collina inruperant, circumvenirentur. concurrere et in campo
Martio infestae acies. pro Flavianis fortuna et parta totiens
victoria: Vitelliani desperatione sola ruebant, et quamquam
pulsi, rursus in urbe congregabantur.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.