M. Tullius Cicero, Philippics
Albert Clark, Albert Curtis Clark, Ed.

5. [12] sed redeo ad amores deliciasque vestras, L. Antonium, qui vos omnis in fidem suam recepit. negatis? num quisnam est vestrum qui tribum non habeat? certe nemo. atqui illum quinque et triginta tribus patronum adoptarunt. rursus reclamatis? aspicite illam a sinistra equestrem statuam inauratam, in qua quid inscriptum est? '“Qvinqve et triginta tribvs patrono.”' populi Romani igitur est patronus L. Antonius. malam quidem illi pestem! clamori enim vestro adsentior. non modo hic latro quem clientem habere nemo velit sed quis umquam tantis opibus, tantis rebus gestis fuit qui se populi Romani victoris dominique omnium gentium patronum dicere auderet? [13] in foro L. Antoni statuam videmus, sicut illam Q. Tremuli¹, qui Hernicos devicit, ante Castoris. O impudentiam incredibilem! tantumne sibi sumpsit, quia Mylasis myrmillo Thraecem iugulavit, familiarem suum? quonam modo istum ferre possemus, si in hoc foro spectantibus vobis depugnasset? sed haec una statua. altera ab² equitibus Romanis equo publico: qui item ascribunt, 'patrono.' quem umquam iste ordo patronum adoptavit? si quemquam, debuit me. sed me omitto; quem censorem, quem imperatorem? agrum eis divisit. O sordidos qui acceperint³, improbum qui dederit⁴! [14] statuerunt etiam tribuni militares qui in exercitu Caesaris bis⁵ fuerunt. quis est iste ordo? multi fuerunt multis in legionibus per tot annos. Eis quoque divisit Semurium⁶. campus Martius restabat, nisi prius cum fratre fugisset. sed haec agrorum adsignatio paulo ante, Quirites, L. Caesaris, clarissimi viri et praestantissimi senatoris, sententia dissoluta est: huic enim adsensi vii virum acta sustulimus. iacent beneficia Nuculae; friget patronus Antonius. nam possessores animo aequiore discedent: nullam impensam fecerant; nondum instruxerant, partim quia non confidebant, partim quia non habebant. [15] sed illa statua palmaris de qua, si meliora tempora essent, non possem sine risu dicere: “L. Antonio a Iano medio patrono.” itane? iam⁷ Ianus medius in L. Antoni clientela est⁸? quis umquam⁹ in illo Iano inventus est qui L. Antonio mille nummum ferret expensum?